Presidenti i FC Barcelonës, Joan Laporta, është rikthyer në aktivitetet zyrtare të klubit, duke bërë paraqitjen e tij të parë publike pasi u shtrua në spital disa ditë më parë për shkak të një aritmie.

Tashmë i rikuperuar, Laporta mbërriti të martën në mesditë në zyrat e Barcelonës për të marrë pjesë në prezantimin zyrtar të 18-vjeçarit Jesse Bisiwu. I shoqëruar nga miku i tij i ngushtë, Edu, presidenti përshëndeti mediat përpara se të hynte në zyrën e tij.

Më pas ai mori pjesë në ceremoninë e prezantimit të sulmuesit belg, një aktivitet që u zhvillua pa praninë e mediave, ndërsa klubi pritet të publikojë pamjet zyrtare të nënshkrimit.

Vetë Laporta kishte bërë të ditur në rrjetet sociale se kaloi disa ditë në Spitalin e Barcelonës për shkak të problemit kardiak, duke siguruar se gjendja e tij shëndetësore është përmirësuar.

“Gjithçka shkoi mirë!!! Ata më përmbysën aritminë!!! Zemra ime po rreh përsëri ritmikisht!!! Shumë mirënjohës ndaj mjekëve, infermierëve dhe stafit të shkëlqyer të kujdesit shëndetësor në Spitalin e Barcelonës”, shkroi presidenti i Barcelonës.

Rikthimi i Laportës në zyrat e klubit vjen në një moment të rëndësishëm për Barcelonën, e cila vijon përgatitjet për sezonin e ri dhe prezantimin e afrimeve të reja në merkato.