Tiranë – Dy kompani shtetërore, “Ujësjellës dhe Kanalizime Tiranë” dhe prodhuesi i kartave të identitetit “Identitek”, të cilat kanë si qëllim kryesor ofrimin e shërbimeve për publikun, rezultojnë të kenë gjeneruar fitime të konsiderueshme gjatë vitit 2025.

Sipas të dhënave të publikuara në raportet vjetore, Ujësjellës-Kanalizime Tiranë (UKT) raportoi të ardhura prej 4.5 miliardë lekësh në vitin 2025, me një rritje prej 2.7%. Fitimi para taksave u rrit me gati 30%, duke arritur në 1.5 miliardë lekë, rreth 16 milionë euro.

Edhe kompania shtetërore “Identitek”, e cila ka vijuar aktivitetin e koncesionarit “Aleat” në prodhimin e kartave të identitetit dhe pasaportave, raportoi të ardhura prej 3.5 miliardë lekësh gjatë vitit 2025, me një rënie vjetore prej 3.8%.

Megjithatë, fitimi i “Identitek” arriti në rreth 1.8 miliardë lekë, ose rreth 19 milionë euro, me një rritje prej 10% krahasuar me një vit më parë.

Në total, të dy operatorët shtetërorë kanë gjeneruar rreth 3.3 miliardë lekë fitime, ose gati 35 milionë euro, gjatë vitit 2025.

Normat e fitimit të këtyre kompanive luhaten mes 30% dhe 50%, dukshëm mbi mesataren e tregut, e cila sipas INSTAT llogaritet në rreth 9–10%.

Në praktikën ndërkombëtare, kompanitë që ofrojnë shërbime publike në kushte monopoli zakonisht rregullohen mbi parimin që tarifat duhet të mbulojnë kostot e shërbimit, investimet e nevojshme dhe një kthim të arsyeshëm, por jo të gjenerojnë norma të larta fitimi të shkëputura nga cilësia e shërbimit.

Në sektorin e ujit, OECD vë theksin te balanca mes rikuperimit të kostove, qëndrueshmërisë financiare dhe përballueshmërisë së tarifave për konsumatorët.

Ujësjellësi i Tiranës, normë fitimi 33%, por jo ujë 24 orë në ditë

Ujësjellës-Kanalizime Tiranë raportoi një normë fitimi prej 33% në vitin 2025, ndërsa në vlerë absolute fitimi arriti nivelin më të lartë që nga viti 2018.

Niveli më i lartë i fitimit para taksave deri më tani ishte regjistruar në vitin 2023, kur arriti në rreth 1.3 miliardë lekë.

Në vitin 2018, çmimi i ujit në Tiranë u rrit mesatarisht me 44%. Që prej atij viti, i cili përkon edhe me periudhën kur UKT filloi të operonte si e vetme pas ndarjes nga Kamza dhe Vora, kompania raporton fitime prej rreth 10–12 milionë eurosh në vit, me përjashtim të vitit 2020.

Në atë kohë, rritja e çmimit u argumentua me nevojën për përmirësimin e gjendjes financiare të UKT-së dhe financimin e investimeve që synonin furnizimin e Tiranës me ujë 24 orë në ditë brenda pesë viteve.

Por të dhënat zyrtare të Entit Rregullator të Ujit tregojnë se ky objektiv nuk është realizuar.

Në vitin 2024, Ujësjellës-Kanalizime Tiranë raportonte mesatarisht vetëm 17 orë furnizim me ujë në ditë, nivel i pandryshuar krahasuar me vitet 2022 dhe 2023. Ndërkohë, në shumë zona furnizimi me ujë vijon të jetë i kufizuar në vetëm disa orë në ditë.

Fitimi kumulativ para taksave i ujësjellësit për periudhën 2018–2025 arrin në rreth 9.1 miliardë lekë.

Ndërkohë, qytetarët detyrohen të blejnë ujë të pijshëm për shkak të shqetësimeve mbi cilësinë e ujit të rubinetit.

“Identitek” fiton gjysmën e shpenzimeve për kartat e identitetit

Edhe “Identitek” rezulton me një normë të lartë kthimi nga aktiviteti i saj.

Sipas të dhënave të paraqitura, kompania kishte një kthim prej 51%, që do të thotë se për çdo 100 lekë të arkëtuara nga qytetarët që aplikojnë për pasaportë apo kartë identiteti, rreth 51 lekë rezultojnë fitim i kompanisë.

Të dhënat ngrenë pikëpyetje mbi raportin mes tarifave që paguajnë qytetarët, kostove reale të shërbimeve dhe fitimeve të realizuara nga kompanitë shtetërore që operojnë në sektorë me karakter të rëndësishëm publik.