Nju Jork – Rrobat dhe aksesorët e përdorur gjatë xhirimeve të filmit të shumëpritur “The Devil Wears Prada 2” do të dalin në një ankand online, duke u dhënë fansave mundësinë të blejnë pjesë të përdorura në produksion.
Sipas njoftimit të shtëpisë së ankandeve Christie’s dhe studiove kinematografike 20th Century Studios, ankandi zhvillohet në bashkëpunim me protagonisten e filmit, Meryl Streep, dhe do të mbahet ekskluzivisht online nga 1 deri më 15 shtator 2026.
Të ardhurat nga shitja do t’i dhurohen Komitetit për Mbrojtjen e Gazetarëve (CPJ), me seli në Nju Jork, si dhe Këshillit të Dizajnerëve të Modës së Amerikës (CFDA).
Në ankand do të përfshihen krijime të modës së lartë dhe aksesorë luksozë të shfaqur në film dhe të veshur nga Meryl Streep, Anne Hathaway, Emily Blunt, Stanley Tucci, Simone Ashley dhe Lady Gaga.
Ndër artikujt më të spikatur janë një palë këpucë të kuqe Valentino Garavani Rockstud, të firmosura dhe autentike, të cilat Meryl Streep i ka veshur në rolin e Miranda Priestly.
Në koleksion përfshihet gjithashtu një pallto me thekë nga Dries Van Noten, pjesë e koleksionit Vjeshtë/Dimër 2025, si dhe një xhaketë bardhezi nga Schiaparelli.
Pjesë e ankandit do të jenë edhe një fustan Gabriela Hearst Niki, i veshur nga Anne Hathaway, një byzylyk Elsa Peretti, i përdorur nga Emily Blunt, si dhe një fustan maxi me pupla nga Bad Binch TongTong, i dizajnuar nga Terrence Zhou dhe i veshur nga Lady Gaga në videoklipin “RUNWAY”.
Koleksioni i veshjeve dhe aksesorëve nga “The Devil Wears Prada 2” do të prezantohet gjithashtu përmes një ekspozite fizike në ambientet e Christie’s në Nju Jork, nga 8 deri më 13 shtator.
Në shitjen online do të përfshihen edhe krijime nga marka të njohura si Dolce & Gabbana, Dior, Elie Saab, Vhernier dhe Fendi, si dhe pulovra klasike në ngjyrë blu-jeshile nga J.Crew.
Kështu, pjesë të garderobës së një prej filmave më të shumëpritur do të shndërrohen në objekte koleksionimi, ndërsa të ardhurat do të shkojnë për dy organizata që veprojnë në fushën e mbrojtjes së gazetarëve dhe industrisë së modës.
