Një konflikt mes të burgosurish është regjistruar ditën e sotme në burgun 302 në Tiranë, ku në përplasje dyshohet se është përfshirë edhe Viktor Ymeri, një emër i njohur në kronikën e zezë.

Sipas raportimeve, Ymeri dyshohet se ka goditur me shuplakë një të burgosur tjetër me origjinë nga Kosova. Sipas pretendimit të Ymerit, ai i kishte kërkuar të burgosurit të mos bënte zhurmë, pasi po i prishte gjumin.

I dënuari, sipas versionit të Ymerit, ka vijuar të bënte zhurmë dhe për këtë arsye ai e ka goditur me shuplakë.

Pas incidentit kanë ndërhyrë menjëherë efektivët e policisë së burgut, duke parandaluar përshkallëzimin e mëtejshëm të konfliktit.

Ngjarja rikthen vëmendjen te situata e tensionuar në këtë institucion, pasi vetëm pak ditë më parë në burgun 302 u regjistrua një tjetër konflikt, ku protagonistë ishin Aldo Gjini, Jurgen Zoto dhe Daniel Bajri. Dy prej tyre mbetën të plagosur me thikë gjatë përleshjes.

Kush është Viktor Ymeri?

Viktor Ymeri, i cilësuar në raportime ndër vite si “i forti i Vlorës”, ka vuajtur 25 vite burg për vrasjen e Arben Pajës dhe Ilir Xhungës.

Ymeri është konsideruar nga autoritetet si një prej personave të afërt me Gazmend Brakën, i njohur ndryshe si Gaxhai, i dënuar me burgim të përjetshëm.

Sipas të dhënave të raportuara për ngjarjen e vitit 1999, Paja dhe Xhunga, të cilët udhëtonin me një furgon tip “Citroen” pranë Drejtorisë së Policisë së Durrësit, u sulmuan me armë.

Fillimisht ndaj tyre u qëllua me një predhë kundërtanku, e cila preku parakolpin e furgonit, por nuk shpërtheu. Më pas, sipas dosjes së ngjarjes, mbi viktimat u qëllua me breshëri kallashnikovi nga disa drejtime.

Të dy mbetën të vrarë në vend.

Për këtë ngjarje, Policia e Durrësit arrestoi në atë kohë Gazmend Brakën dhe Viktor Ymerin, të cilët u gjetën në banesën e një mjeku në Durrës.

Ymeri është përmendur gjithashtu ndër vite për lidhje miqësie dhe farefisnie me Edison Harizajn, i cili u ekzekutua në Durrës.