Tre persona, të gjithë familjarë me njëri-tjetrin, janë vënë në pranga në Laç, pasi dyshohet se kanë qëlluar me armë zjarri në drejtim të automjetit me të cilin lëvizte kushëriri i tyre. Një tjetër person është shpallur në kërkim.

Ngjarja është regjistruar mesditën e djeshme në rrugën e Patokut, pas kallëzimit të shtetasit P. L., 38 vjeç, i cili ka deklaruar se në drejtim të automjetit të tij ishte qëlluar me armë zjarri.

Pas veprimeve të shpejta hetimore dhe policore, specialistët e Seksionit për Hetimin e Krimeve Kundër Personit kanë bërë të mundur lokalizimin dhe ndalimin e Gj. L., 67 vjeç, Gj.(A.) L., 40 vjeç, babë e bir, si dhe E. L., 28 vjeç, kushëri i tyre. Të tre janë banues në Laç.

Ndërkohë, është shpallur në kërkim edhe V. Gj.(L.), 35 vjeç, djali tjetër i Gj. L.

Konflikti verbal për motive të dobëta

Nga veprimet hetimore, sipas Policisë, ka rezultuar se personat e përfshirë, pas një konflikti verbal me kushëririn e tyre dhe për motive të dobëta, kanë qëlluar me armë zjarri në drejtim të automjetit me të cilin ai po lëvizte.

Fatmirësisht, nga të shtënat nuk ka persona të dëmtuar.

Gjatë largimit nga vendngjarja, 38-vjeçari P. L. ka përplasur me automjetin që drejtonte një tjetër automjet. Përplasja ka shkaktuar vetëm dëme materiale.

Automjeti i 38-vjeçarit është sekuestruar në cilësinë e provës materiale.

Policia vijon punën për  kapjen e personit të shpallur në kërkim,  gjetjen e armës së zjarrit dhe  përcaktimin e përgjegjësisë penale të secilit prej personave të përfshirë.

Materialet procedurale i janë referuar Prokurorisë së Lezhës për veprime të mëtejshme.