Parandalohet përshkallëzimi i ngjarjes në “Uji i Ftohtë”, policia sekuestron pistoletë, dy krehra dhe 30 fishekë

Një konflikt për motive pronësie mes dy vëllezërve ka rrezikuar të përshkallëzohet në një ngjarje të rëndë në lagjen “Uji i Ftohtë” në Vlorë.

Policia ka ndërhyrë menjëherë pas marrjes së njoftimit për konfliktin, duke arrestuar në flagrancë një 47-vjeçar me precedent kriminal për trafikim të lëndëve narkotike.

Në pranga është vënë shtetasi J. T., i cili dyshohet se ka kanosur me armë zjarri vëllanë e tij, për shkak të një konflikti lidhur me pronësinë.

Gjatë ndërhyrjes, policia ka sekuestruar një pistoletë, dy krehra dhe 30 fishekë.

Ngjarja është trajtuar në kuadër të operacionit të koduar “Lidhja”, ndërsa shërbimet e Komisariatit të Policisë Vlorë kanë shkuar në vendngjarje për të sqaruar rrethanat dhe përfshirjen e personave në konflikt.

Sipas policisë, ndërhyrja në kohë ka parandaluar përshkallëzimin e mëtejshëm të konfliktit familjar.

Materialet procedurale i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Vlorë, për veprime të mëtejshme.