Një tren pasagjerësh ka dalë nga shinat pranë qytetit Lewes, në juglindje të Anglisë, duke lënë të plagosur 20 persona. Dy prej tyre raportohet se janë në gjendje të rëndë.
Në tren ndodheshin rreth 150 pasagjerë. Sipas shërbimeve të emergjencës, treni po udhëtonte nga Londra drejt Sussex-it kur doli nga shinat.
Pamjet nga vendi i ngjarjes tregojnë të paktën tre vagonë të përmbysur. Menjëherë pas aksidentit në zonë u mobilizuan ambulanca dhe ekipe të shumta të emergjencës për t’u ardhur në ndihmë pasagjerëve.
Pasagjerët e kanë përshkruar momentin e aksidentit si tejet të frikshëm.
“Treni filloi të lëvizte nga njëra anë në tjetrën dhe doli nga shinat. Na u duk sikur ishim në ajër”, tregoi një prej pasagjerëve.
Ekipet e emergjencës vijojnë ndërhyrjen në vendngjarje, ndërsa pritet të përcaktohen rrethanat dhe shkaqet e daljes së trenit nga shinat.
