Vrasja e turistit portugez 20-vjeçar, Luis Miguel Varela Mendes, në Ksamil vijon të marrë vëmendje edhe në mediat portugeze, të cilat kanë publikuar detaje të reja mbi ngjarjen e rëndë të ndodhur më 18 gusht.

Sipas raportimeve, Mendes u godit për vdekje me thikë nga Sokrat Lipan alias Sokrat Vata, 29 vjeç, i cili dyshohet se punonte si roje sigurie në plazhin ku ndodhi krimi dhe kishte precedentë penalë.

Ngjarja nisi rreth orës 05:15 të 18 gushtit, në lokalin “Principote” në Ksamil, dhe më pas vijoi në plazhin “Paradise”. Sipas hetimeve, gjatë konfliktit Sokrat Vata dyshohet se e goditi disa herë me thikë 20-vjeçarin portugez.

Në përleshje dyshohet se ishte përfshirë edhe shtetasi francez David Heurtevent, 29 vjeç, i cili është shpallur në kërkim. Ai dyshohet se e ka goditur Mendes me grushte. Të dy akuzohen për vrasje me dashje në bashkëpunim.

Pas ngjarjes, Sokrat Vata u largua nga vendi i krimit, por u arrestua disa orë më vonë. Sipas mediave portugeze, ai u gjet i fshehur në bagazhin e një makine.

Ndërkohë, trupi i pajetë i Luis Mendes pritet t’i nënshtrohet autopsisë në Shqipëri.

Të përfshirë edhe punonjës të lokalit

Hetimet kanë zbardhur gjithashtu përfshirjen e disa punonjësve të lokalit “Principote” në konfliktin që parapriu vrasjen.

Sipas policisë, katër kamarierët Serxhi Selimi, Ervis Bunci, Ildi Cekani dhe Murat Zhabina dyshohet se kanë goditur me grushte 20-vjeçarin portugez përpara se të largoheshin nga vendi i ngjarjes.

Në lokal ndodheshin edhe disa persona që kishin rolin e bodyguard-ëve: Miosid Matushaj, Luciano Seferi, punonjës i IEVP Fier, Romeo Shehu, punonjës i Policisë Bashkiake Gjirokastër, dhe Kristi Koshi.

Sipas hetimeve, këta persona nuk kanë ndërhyrë për të parandaluar përshkallëzimin e konfliktit dhe nuk kanë njoftuar policinë pas ngjarjes. Për këtë arsye, ata akuzohen për moskallëzim të krimit.

Ndaj Miosid Matushajt rëndon edhe akuza për mosmarrje të masave për ndërprerjen e gjendjes së paligjshme.

Pronari i lokalit është shpallur në kërkim

Në momentin e ngjarjes ndodhej në “Principote” edhe pronari i lokalit, Bekim Bulica. Sipas hetimeve, pas krimit ai është larguar nga vendi dhe është shpallur në kërkim për moskallëzim të krimit.

Ndërkohë, hetimet vijojnë për të përcaktuar në mënyrë të plotë dinamikën e konfliktit që çoi në vrasjen e turistit portugez dhe përgjegjësinë e secilit prej personave të dyshuar.

Ngjarja ka shkaktuar reagime të forta në Portugali, ndërsa rasti pritet të vijojë të ndiqet nga afër nga autoritetet shqiptare dhe ato portugeze.