Detaje të reja janë zbardhur nga ngjarja e rëndë që tronditi rajonin e Rodopit në Greqi, ku 44-vjeçarja Esma Muço u vra me thikë nga bashkëshorti i saj, 53-vjeçari Bujar Muço.

Sipas mediave greke, 53-vjeçari ka pranuar para Policisë autorësinë e krimit, duke deklaruar: “E bëra nga nervat, sepse humba kontrollin”.

Gruaja u gjet e plagosur rëndë brenda banesës dhe u transportua në spitalin e Komotinisë. Pavarësisht përpjekjeve të mjekëve, ajo nuk mundi të mbijetojë.

Sipas ekzaminimit mjeko-ligjor, 44-vjeçarja humbi jetën si pasojë e një plage të shkaktuar nga një thikë kuzhine rreth 20 centimetra e gjatë. Goditja i shkaktoi hemorragji të brendshme dhe të jashtme në mushkërinë e djathtë.

Mjekët vlerësojnë se vdekja ka ardhur rreth pesë minuta pas momentit të plagosjes.

Pas sulmit ndaj bashkëshortes, 53-vjeçari ka dëmtuar edhe veten. Ai ndodhet aktualisht i shtruar në spital, nën mbikëqyrjen e Policisë, pasi ka marrë një plagë në kraharor.

Dy fëmijët dëshmitarë të tragjedisë

Në kuadër të hetimeve kanë dhënë dëshmitë e tyre edhe dy fëmijët e çiftit, të cilët u përballën me momentet e rënda të ngjarjes.

Vajza 16-vjeçare ishte ajo që njoftoi Policinë për sulmin, ndërsa djali 19-vjeçar e transportoi nënën e tij në spital. Pavarësisht ndërhyrjes së mjekëve, 44-vjeçarja nuk mundi të shpëtonte.

Kishte denoncim të mëparshëm për dhunë

Hetimet kanë nxjerrë në pah edhe një histori të mëparshme problematike në marrëdhënien e çiftit.

Sipas të dhënave të Policisë greke, në vitin 2022, në Heraklion të Kretës, Bujar Muço ishte arrestuar në flagrancë pas një denoncimi për kërcënim dhe dhunë në familje ndaj bashkëshortes së tij.

Avokatja e viktimës ka deklaruar se denoncimi i vitit 2022 nuk ishte i vetmi episod problematik në marrëdhënien e tyre.

Gjithashtu raportohet se 53-vjeçari kishte marrë më herët trajtim psikiatrik në një klinikë, ku kishte qëndruar për dy net, përpara se të lirohej për të vijuar trajtimin me medikamente.

Autoritetet greke vijojnë hetimet për zbardhjen e plotë të rrethanave, dinamikës së krimit dhe historisë së marrëdhënies mes çiftit.