Uljan Shpataraku, ish-punonjësi i Policisë që shoqëronte Ergys Agasin në momentin e arrestimit të tij, do të vijojë të qëndrojë në qeli. Gjykata e Posaçme kundër Korrupsionit dhe Krimit të Organizuar (GJKKO) ka caktuar ndaj tij masën e sigurisë “arrest në burg”.

Shpataraku u arrestua më 26 gusht, gjatë operacionit që çoi në pranga edhe Ergys Agasin, i cili ishte shpallur në kërkim nga autoritetet dhe kishte mundur t’i shmangej arrestimit për rreth tetë muaj.

Ish-punonjësi i Policisë ishte drejtuesi i automjetit me të cilin udhëtonte Agasi. Ky i fundit ndodhej në sediljen e pasagjerit.

Automjeti u ndalua në hyrjen jugore të Durrësit, në zonën e Plepave, pas një operacioni të zhvilluar nga strukturat e specializuara të Policisë së Shtetit.

Sipas të dhënave të bëra publike, autoritetet kishin qenë prej javësh në gjurmët e Agasit. Ai u lokalizua në Elbasan dhe më pas u mbajt nën vëzhgim gjatë lëvizjes drejt Durrësit, ku edhe u ndërhy për arrestimin e tij.

Në momentin e ndalimit, Agasi ndodhej në të njëjtin automjet me Shpatarakun. Për shkak të rrethanave në të cilat u konstatua duke shoqëruar një person të shpallur në kërkim, ish-punonjësi i Policisë u arrestua në flagrancë.

Shpataraku dyshohet për veprën penale “Përkrahja e autorit të krimit”.

Roli i tij po hetohet edhe në raport me periudhën e gjatë gjatë së cilës Agasi arriti t’i shmangej arrestimit. Agasi ishte shpallur në kërkim që prej dhjetorit 2025, ndërsa për muaj me radhë mbeti e paqartë nëse ishte larguar nga Shqipëria apo vazhdonte të qëndronte brenda vendit.

Vendimi i GJKKO-së e lë Shpatarakun në masën “arrest në burg”, ndërsa hetimet vijojnë për të zbardhur rrethanat dhe rolin e tij në ndihmën që dyshohet se i është dhënë personit të kërkuar.