Marjana Karolina Bunaj, 37-vjeçarja shtatzënë që humbi jetën teksa transportohej nga spitali i Pogradecit drejt Tiranës, priste fëmijën e saj të parë.

Gruaja me origjinë nga Mirdita, e martuar në Pogradec, ishte në muajin e shtatë të shtatzënisë. Bashkëshorti i saj ishte larguar prej pak ditësh drejt Shteteve të Bashkuara, ku jeton së bashku me familjen, ndërsa 37-vjeçarja priste që t’u bashkohej.

Ngjarja ndodhi gjatë natës. Mesnatën e së dielës, Marjana kishte shfaqur dhimbje barku dhe kishte telefonuar motrën e saj, e cila banonte pranë. Ajo shkoi menjëherë për ta marrë dhe e dërgoi në spitalin e Pogradecit.

Atje, mjekët dyshuan për hemorragji. Pasi u vendos në katin e sipërm të maternitetit, u konstatua se gjendja e saj kërkonte transportim drejt Tiranës.

Sipas informacioneve paraprake, 37-vjeçarja ishte paraqitur me parametra të ulët jetësorë dhe në gjendje të rënduar. Në spital është kryer edhe reanimimi, ndërsa është diskutuar mundësia e transportimit me helikopter. Megjithatë, për shkak të errësirës, transporti ajror nuk mund të realizohej.

Rreth orës 04:30, Marjana Karolina Bunaj u nis me ambulancë drejt Tiranës. Por gjatë rrugës, në hyrje të Elbasanit, gjendja e saj u përkeqësua.

Infermierja, pasi konstatoi se 37-vjeçarja nuk po reagonte më, i është drejtuar shoferit të ambulancës:

“Fute te spitali i Elbasanit se na iku.”

Motra e 37-vjeçares ndodhej gjithashtu në ambulancë gjatë transportit. Sipas dëshmisë së saj, Marjana mbërriti e pajetë në spitalin e Elbasanit.

Pas ngjarjes, trupi i 37-vjeçares është dërguar për autopsi në morgun e Tiranës, ndërsa motra e saj është paraqitur në Komisariatin nr. 4, ku ka bërë kallëzim.

Rrethanat e plota të vdekjes së Marjana Karolina Bunajt pritet të përcaktohen pas ekspertizës mjeko-ligjore dhe hetimeve që do të verifikojnë trajtimin e saj në spitalin e Pogradecit, gjendjen shëndetësore gjatë transportit dhe shkaqet që çuan në humbjen e jetës.