Përplasja verbale mes Kanadasë dhe Shteteve të Bashkuara për emrin e Liqenit Ontario ka marrë një tjetër kthesë, pasi kryeministri i Ontarios, Doug Ford, i është përgjigjur presidentit amerikan Donald Trump pas vendimit për përdorimin zyrtar të emrit “Lake America” nga autoritetet amerikane.
Ford prezantoi një tabelë të madhe të vendosur në anën kanadeze të liqenit, ku shkruhet: “Lake Ontario. Now and Always” – “Liqeni Ontario. Tani dhe përgjithmonë”.
Reagimi i tij erdhi pasi Trump nënshkroi të enjten një urdhër ekzekutiv që udhëzon autoritetet amerikane të përdorin emrin “Lake America”. Presidenti amerikan publikoi gjithashtu në rrjetet sociale disa video të krijuara me inteligjencë artificiale lidhur me liqenin, i cili shtrihet mes Kanadasë dhe Shteteve të Bashkuara.
Duke folur përpara tabelës së re, Ford u shpreh:
“Shumë kohë përpara Presidentit Trump, ky liqen quhej Liqeni Ontario. Shumë kohë pasi Presidenti Trump të jetë larguar, ai do të vazhdojë të quhet Liqeni Ontario.”
Kryeministri i Ontarios e lidhi vendimin e Trump edhe me përplasjet e fundit mes dy vendeve, duke pretenduar se presidentit amerikan “nuk i pëlqeu që Ontario dhe Kanadaja mbrojtën veten”.
Ford theksoi se tabela ishte vendosur për të riafirmuar qëndrimin e provincës dhe për t’iu përgjigjur drejtpërdrejt ndryshimit të emrit nga pala amerikane.
“Në rast se Presidenti Trump apo dikush tjetër harron, e kemi vendosur këtë tabelë për t’ua kujtuar: është Liqeni Ontario, tani dhe përgjithmonë”, tha Ford.
Vendimi i administratës amerikane për përdorimin e emrit “Lake America” ka shkaktuar reagime në Kanada, ndërsa deklaratat e Fordit e kanë kthyer çështjen në një përplasje simbolike mes dy vendeve fqinje.
Ndërsa SHBA-ja mund të përdorë emërtimin e ri në dokumentet dhe platformat e saj zyrtare, Kanadaja vazhdon ta njohë liqenin me emrin historik Liqeni Ontario.
