Shkodër / Burrel — Autoritetet kanë ndërmarrë një aksion të befasishëm mëngjesin e sotshëm në dy nga institucionet e ekzekutimit të vendimeve penale në vend.
Nga burime të sigurta mësohet se Agjencia e Mbikëqyrjes Së Ekzekutimit Të Vendimeve Penale (AMSEVP) ka zbarkuar që në orët e para të mëngjesit për të kryer kontrolle të imtësishme në burgun e Reçit (Shkodër) dhe në atë të Burrelit.
Zbulohen sendet e ndaluara në qeli
Operacioni i befasishëm ka pasur në fokus kontrollin e qelive dhe të ambienteve të përbashkëta ku qëndrojnë të dënuarit, me qëllim rritjen e parametrave të sigurisë në këto institucione.
Sipas të dhënave të para nga terreni, gjatë kontrolleve të kryera nga agjentët e AMSEVP-së janë gjetur dhe sekuestruar sende të ndaluara te disa prej të burgosurve.
Aksioni vijon ende në ambientet e brendshme të dy burgjeve, ndërsa pritet një njoftim zyrtar për të zbardhur llojin dhe sasinë e sendeve të sekuestruara, si dhe masat disiplinore që do të merren ndaj personave përgjegjës.