Kampionati Europian Universitar i Sporteve Luftarake, që po zhvillohet në Tiranë, është shoqëruar me debate mbi kushtet e akomodimit të sportistëve pjesëmarrës.

Pas publikimit të pamjeve dhe ankesave në rrjetet sociale, ka reaguar ministri i Turizmit, Kulturës dhe Sportit, Blendi Gonxhja, i cili i ka cilësuar pretendimet si “të pavërteta dhe keqinformuese”.

Në Tiranë ndodhen rreth 1,600 pjesëmarrës nga 400 universitete dhe 38 vende europiane. Aktiviteti ka nisur më 11 shtator dhe përfshin disa disiplina të sporteve luftarake.

Gonxhja ka kundërshtuar mënyrën se si është paraqitur situata në internet, duke argumentuar se pamjet e publikuara nuk përfaqësojnë kushtet reale ku janë akomoduar sportistët.

Sipas informacionit zyrtar të organizatorëve, pjesëmarrësit janë sistemuar në disa godina të Qytetit Studenti, ndërsa për kategori të caktuara të delegacioneve dhe zyrtarëve janë parashikuar edhe ambiente të tjera akomodimi.

Organizimi i fjetjes është ndarë në grupe sipas disiplinave dhe datave të garave.

Debati nisi pas publikimit në rrjetet sociale të disa pamjeve, për të cilat pretendohet se sportistët janë përballur me probleme të pastërtisë dhe kushteve higjieno-sanitare.

Disa prej këtyre postimeve kanë marrë vëmendje të madhe, duke ngritur pikëpyetje mbi organizimin e aktivitetit dhe standardet e mikpritjes ndaj delegacioneve të huaja.

Nga ana tjetër, ministri Gonxhja e ka kundërshtuar këtë panoramë, duke e lidhur situatën me publikime që, sipas tij, nuk japin një pasqyrë të saktë të kushteve të akomodimit të sportistëve.

Kampionati Europian Universitar i Sporteve Luftarake vijon në Tiranë, ndërsa krahas rezultateve sportive, debati për kushtet e akomodimit ka marrë një pjesë të konsiderueshme të vëmendjes publike.