Bisedimet mes Iranit dhe disa vendeve të Gjirit Persik për situatën në Ngushticën e Hormuzit janë shtyrë, njoftoi ministria e Jashtme e Omanit.

Ministri i Jashtëm i Omanit, Badr al-Busaidi, deklaroi se takimi i planifikuar për sot u shty “në interes të arritjes së konsensusit”.

Al-Busaidi theksoi se Omani mbetet i angazhuar për nxitjen e dialogut, me synim forcimin e stabilitetit dhe bashkëpunimit afatgjatë në rajon. Megjithatë, ai nuk bëri të ditur një datë të re për zhvillimin e takimit dhe nuk dha shpjegime të mëtejshme për arsyet e shtyrjes.

Në takimin e planifikuar ishin ftuar ministrat e Jashtëm të Iranit, Irakut, Omanit, Kuvajtit, Bahreinit, Katarit, Emirateve të Bashkuara Arabe dhe Arabisë Saudite.

Badr al-Busaidi dhe homologu i tij iranian, Abbas Araghchi, pritej t’u raportonin përfaqësuesve të qeverive për ecurinë e negociatave.

Irani dhe Omani kërkojnë mekanizëm për trafikun detar

Teherani dhe Muskat kanë zhvilluar prej disa javësh negociata për krijimin e një mekanizmi që do të rregullonte trafikun detar përmes Ngushticës së Hormuzit.

Kjo rrugë ujore është një pikë strategjike për tregtinë globale, veçanërisht për transportin e naftës, gazit dhe plehrave kimike.

Për udhëheqjen iraniane, Ngushtica e Hormuzit është kthyer në një instrument të rëndësishëm presioni në përplasjen me Shtetet e Bashkuara.

Pas shpërthimit të luftës në fund të shkurtit, Irani kufizoi ndjeshëm lëvizjen e anijeve nëpër ngushticë, duke përdorur kërcënime dhe sulme ndaj mjeteve lundruese.

Para konfliktit, Hormuzi ishte i hapur për trafikun detar. Ndërkohë, Marina amerikane ka vendosur një bllokadë detare ndaj porteve iraniane.

Teherani kërkon lëshime nga SHBA-ja

Në kuadër të negociatave, Irani kërkon lëshime nga qeveria amerikane, në përputhje me ato të parashikuara në një marrëveshje kuadër të arritur në qershor.

Shtyrja e takimit të vendeve të Gjirit vjen në një moment kur Ngushtica e Hormuzit mbetet një nga pikat më të ndjeshme të konfliktit dhe një nyje me rëndësi të madhe për sigurinë dhe tregtinë globale.