Një 37-vjeçar shqiptar dhe një 32-vjeçar austriak janë arrestuar në Vjenë, pasi dyshohen për përfshirje në shpërndarjen e lëndëve narkotike.

Sipas raportimeve të mediave të huaja, operacioni u zhvillua në zonën Leopoldstadt, ku policia kishte vënë nën vëzhgim shqiptarin pas konstatimit të sjelljes së dyshimtë.

Gjatë një takimi me 32-vjeçarin austriak, shqiptari vendosi një çantë shpine në automjetin e tij. Gjatë kontrollit, efektivët gjetën në çantë më shumë se një kilogram kanabis.

Hetimet vijuan me kontrolle në dy apartamente, ku policia sekuestroi rreth 17 kilogramë marihuanë, 1.5 kilogramë kokainë dhe rreth 60 gramë Crystal Meth.

Gjithashtu, gjatë kontrolleve u gjetën telefona celularë dhe rreth 160 euro cash.

Të dy personat u arrestuan, ndërsa hetimet vijojnë për të përcaktuar rolin e secilit në aktivitetin e dyshuar dhe për të verifikuar nëse janë të përfshirë edhe persona të tjerë.

Autoritetet austriake po vijojnë hetimet për të zbardhur të plotë rrjetin e dyshuar të shpërndarjes së narkotikëve.