Një 32-vjeçar nga Shkupi është zhdukur në ujërat e Liqenit të Ohrit, ndërsa policia, ekipet e zhytjes dhe shpëtimtarët malorë kanë nisur kërkimet për gjetjen e tij.

Sipas njoftimit të policisë, babai i të riut, i identifikuar me inicialet B.S., raportoi zhdukjen e djalit më 14 shtator, rreth orës 18:10, në Stacionin Policor të Ohrit.

32-vjeçari po qëndronte së bashku me babain në një auto-kamp në Ohër, por ishte larguar nga kampi dhe nuk ishte kthyer më. Më vonë, babai gjeti në plazh disa prej rrobave të tij, telefonin celular dhe një varkë gome.

Pas marrjes së njoftimit, ekipet e policisë së liqenit dhe Stacionit Policor të Ohrit nisën kërkimet, të mbështetura nga pjesëtarë të shërbimit alpinist të shpëtimit dhe një ekip nga klubi i zhytjes “Ohri”.

Operacioni po zhvillohet si në ujërat e liqenit, ashtu edhe në tokë, me qëllim gjetjen e 32-vjeçarit dhe sqarimin e plotë të rrethanave të zhdukjes.

Autoritetet vijojnë kërkimet, ndërsa deri në këto momente nuk janë bërë të ditura të dhëna të tjera për fatin e të riut.