90 steka cigare kontrabandë janë zbuluar në një autobus të linjës Tiranë–Athinë gjatë një kontrolli në pikën kufitare të Kakavijës.

Kontrolli është zhvilluar në orët e para të mëngjesit, ndërsa sipas të dhënave paraprake, cigaret dyshohet se ishin fshehur në hapësira të mbyllura të autobusit, në përpjekje për t’iu shmangur kontrollit doganor.

Gjatë kontrollit në mjet janë gjetur gjithashtu disa çanta me veshje, për të cilat nuk disponoheshin faturat e blerjes dhe dokumentet përkatëse të zhdoganimit.

Për rastin, policia ka nisur procedimin penal ndaj drejtuesit të autobusit dhe një personi tjetër përgjegjës për mjetin.

Ndërkohë, hetimet vijojnë për të dokumentuar rrethanat e plota të ngjarjes dhe për të përcaktuar nëse në rast janë të përfshirë edhe persona të tjerë.

Në kuadër të hetimeve pritet të verifikohen edhe pamjet e kamerave të sigurisë në pikën kufitare të Kakavijës, komunikimet telefonike të personave nën hetim, si dhe roli i punonjësve të doganës që kanë qenë në shërbim në momentin e kalimit të autobusit.