Dymbëdhjetë parti të vogla, që ishin pjesë e 106 partive që u gjobitëm me nga 1 milion lekë të rinj për shkak se nuk bënë transparencë me financat, kanë ankimuar vendimin e Komisionerit Shtetëror të Zgjedhjeve.
“Me ankues Partia Aleanca Demokristiane, Partia Lëvizja e Legalitetit, Partia Balli Kombëtar, Partia Ora e Shqipërisë, Partia Bashkimi Demokrat, Partia Balli Kombëtar Demokrat, Partia Kombëtare Konservatore Albania, Partia Bashkimi Popullor i Pensionistëve Shqiptarë, Partia Demokracia e Re Europiane, Partia Emigracioni Shqiptar, Partia Lëvizja Demokratike e Shqipërisë, Partia Aleanca Maqedonasve për Integrim Europian, Partia Lëvizja Demokratike për Ndryshim, Partia Demokratike e Bashkimit Mysliman Shqiptar, Partia e Gjelbër, Partia e Minoriteti Etnik Grek për të Ardhmen, Partia për Zhvillim Kombëtar, Partia Popullore Kristiandemokrate e Shqipërisë dhe Partia Uniteti Kombëtar”, njoftoi dje KQZ.
Në prapësimin e bërë nga Partia Bindja Demokratike thuhet se vendimi i Komisionerit është marrë në tejkalim ligjor. Sipas argumentit të Bindjes Demokratike, ligji parashikon që partitë të bëjnë transparencë me raportet financiare, por nuk përcakton afat se kur duhet të dorëzohen raportet në KQZ.
Ndërkohë, dje Komisioni i Ankesave shqyrtoi ankimimet dhe sot pritet që të japë vendimin përfundimtar. Ndërkohë, partitë e vogla, nëse gjoba mbetet në fuqi, do të kenë edhe një mundësi tjetër për ta apeluar në Kolegj Zgjedhor. Në korrik të këtij vitit Komisioni Qendror i Zgjedhjeve gjobiti 106 parti me nga 1 milion lekë për shkak se nuk kanë dorëzuar raportin financiar, ndërsa 4 të tjera janë gjobitur për shkak se nuk e kanë dorëzuar atë në afatin e përcaktuar.
