Prokuroria e Posaçme Antikorrupsion i ka kthyer përgjigje Presidentit Ilir Meta, pas kërkesës që ky i fundit bëri, ku kërkoi informacion për ministrat e qeverisë së re.

Kërkesa në fjalë bëhej për të evidentuar nëse ndonjë prej këtyre zyrtarëve janë duke u hetuar apo jo nga Prokuroria.

Në përgjigjen e saj, prokuroria e posaçme thotë se asnjë prej ministrave nuk rezulton të jetë nën hetim.

“Asnjë prej emrave të paraqitur nuk është i regjistruar si person nën hetim në regjistrin e njoftimit të veprave penale të Prokurorisë së Posaçme,” -thuhet në përgjigjen e SPAK.

Dy ditë më parë, Presidenti Meta iu drejtua me një shkresë Prokurorisë së Përgjithshme dhe SPAK-ut, ku kërkohej t’i vihej në dispozicion për çdo kandidat të propozuar, lidhur me procese hetimore apo penale që janë nisur ndaj tyre. Organi i Akuzës iu përgjigj dje kërkesës së Kreut të Shtetit, duke i thënë se asnjë emër i propozuar nga Rama për të qenë pjesë e kabinetit qeveritar nuk rezulton të jetë proceduar penalisht.

“Bazuar në nenin 92 pika h të Kushtetutës, Presidenti i Republikës, Ilir Meta, kërkon të informohet nëse dispononi të dhëna, apo informacione mbi emrat e kandidatëve të propozuar, lidhur me proceset hetimore apo penale që janë nisur apo mund të jenë në fazë vlerësimi për t’u iniciuar, për secilin prej tyre”, thuhet në shkresën e sekretares së Përgjithshme të Presidencës.

Kujtojmë se një ditë më parë, Prokuroria e Përgjithshme i ka kthyer përgjigje kreut të shtetit në lidhje me të njëjtën kërkesë. Sipas organit të akuzës, asnjë prej kandidatëve për ministra nuk është person nën hetim.