Ministrja e Shëndetësisë dhe Mbrojtjes Sociale, Ogerta Manastirliu i ka bërë një thirrje nga foltorja e kuvendit opozitës, që të bëhet pjesë e përpjekjeve për të nxitur qytetarët të vaksinohen, duke mbrojtur kështu shëndetin e tyre.

Manastirliu teksa i bëri thirrje qytetarëve të vaksinohen i këshillloi ata të mos dëgjojnë ata persona të cilët janë kundër vaksinimit, pasi sipas saj vaksina është i vetmi mjet që mund ti jap fund pandemisë.

“Dua ta nis këtë fjalë sot me një falënderim publik për ekipin e madh të vaksinatorëve. Ata që punojnë çdo ditë dhe nuk janë ndalur që nga janari i këtij viti që është bërë vaksina e parë dhe do të vijojnë deri në vaksinimin e të gjithë popullsisë. Rastet e reja kanë pësuar një ulje gjatë javëve të fundit, por incidenca e vdekjeve vijon të jetë e lartë. Në luftën për jetën e vetmja masë mbrojtëse që ne kemi sot është vaksina. Luftës për jetën i bëjnë keq deklaratat në rrjete sociale por edhe në këtë sallë për vaksina të pa sigurta. Edhe debatet shterpë nuk i shërbejnë luftës për jetës.

Nuk do të ishte turp, as lëshim, as tërheqje, sikur çdo njeri prej deputetëve ti bënte një thirrje qytetarëve, në media, ose në rrjete sociale të vaksinohen. Fitorja e kësaj lufte nuk është fitorja e vetëm një qeverie, është fitore e të gjithë qytetarëve. Duhet të kuptojnë që mbrojtja e shëndetit të çdo qytetari duhet të ketë objektivi në këtë sallë. Çdo qytetar duhet të nxitet për tu vaksinuar duke filluar nga ne, këtu në sallë. Nuk po flas vetëm për popullatën mbi 18-vjeç e cila është popullata target, por po flas edhe për dozat e treta edhe për uljen e fashës nën 18-vjeç nëse ekspertët do të vendosim. Akti normativ që miratojmë sot, i hap rrugë sigurimit në një kohë shumë të shpejtë, brenda 3 muajsh, të 500 mijë vaksinave Pfizer, seria e parë e të cilave vjen brenda Tetorit. Eshtë hapi i radhës, në një seri tashmë të panumërt hapash, në rrugëtimin tonë të nisur prej muajit dhjetor, për të sjellë në Shqipëri vaksina të sigurta dhe të çertifikuara”, deklaroi Manastirliu.