Nënkryetari i Partisë Demokratike, Enkelejd Alibeaj, tha se Kuvendi Kombëtar i PD propozon krijimin e një strukture organizative e emërtuar si Aleanca Qytetare për Demokracinë.

Enkelejd Alibeaj, prezantoi përballë delegatëve ndryshimet statutore të propozuara nga Kryesia në lidhje me krijimin e Aleancës Qytetare.

Në fjalën e tij, Alibeaj tregoi synimin e kësaj aleance, si dhe përbërjen e saj, ndërsa shtoi se PD garanton që Aleanca Qytetare për Demokracinë të ketë një përfaqësim prej 10% në pozicione drejtuese në parti.

Sipas Alibeaj, krijimi i kësaj organizata do të shërbejë për afrimin me Partinë Demokratike të intelektualëve të spikatur në shoqëri, por pa qenë nevoja që të jenë anëtarë të kësaj force politike.

“Në cilësinë e përfaqësuesit të Komisionit, me propozim të Kryesisë propozohet që në statutin e PD-së të shtohen dy dispozita të cilat i dedikohen krijimit të një strukture të re demokratike që quhet Aleanca Qytetare për Demokracinë. 

1. Partia ka edhe Aleancën Qytetare për Demokracinë.
2. Kjo organizatë partnere përbëhet nga intelektualë me reputacion profesionalë, që shfaqin interes dhe bashkëndajnë vlera dhe parimet e PD. Anëtarësimi në parti nuk është kusht.

3. Kjo aleancë synon të analizojë e të japë mendim kritikë me sugjerime konkrete ndaj politikave, qasjeve e nismave zyrtare të PD, duke e ndihmuar partinë të forcojë dialogun dhe lidhjen me shoqërinë.
4. PD garanton përfaqësimin e Aleancës Qytetare për Demokracinë me të paktën 10% të të zgjedhurve me pozicione drejtuese në parti”, tha Alibeaj.