Italia ka anuluar të gjithë festimet publike për Vitin e Ri, ndërsa autoritetet kanë thënë se maskat duhet të përdoren edhe në ambientet e jashtme. Ndërkohë edhe lokalet e natës do të jenë të mbyllura deri në 31 janar.
Rastet në rritje të të infektuarve me Omicron kanë detyruar autoritetet të vendosin masa të reja kufizuese, pavarësisht se gati 90% e italianëve janë plotësisht të vaksinuar.

“Maskat do të jenë të detyrueshme edhe jashtë dhe ne po parashikojmë një dispozitë që kërkon një maskë të tipit FFP2, për zona të caktuara si transporti në distanca të gjata, transporti publik lokal, kinematë, teatrot, muzetë, eventet sportive të brendshme dhe madje edhe stadiume”, u shpreh Roberto Speranza, ministër italian i Shëndetësisë.

Nga e hëna, Danimarka do t’u kërkojë të huajve që hyjnë në vend një test negativ Covid-19 pavarësisht nëse janë të vaksinuar apo jo.

Shkollat, teatrot dhe vendet argëtuese janë mbyllur, por falë vaksinave përforcuese qeveria daneze nuk mendon se një bllokim i plotë është i nevojshëm.

Nivelet e larta të vaksinimit po lejojnë që në Suedi të mos pezullohen festimet e Krishtlindjes, pavarësisht rritjes së shpejtë të infeksioneve të reja dhe presioneve në sistemin e kujdesit shëndetësor