Presidenti Ilir Meta ka reaguar ashpër pas ngjarjeve të rënda kriminale ditët e para të vitit të ri në Tiranë.

Gjatë një postimi në rrjetet sociale, Meta thotë se pas ngjarjes së djeshme kriminale në “Don Bosko” është cenuar siguria dhe jeta e shqiptarëve në kryeqytet. Gjithashtu Meta i bën thirrje Policisë së Shtetit dhe të gjithë institucioneve ligjzbatuese në vend, të forcojnë punën për arrestimin e autorëve të këtij krimi të rëndë.

Reagimi nga Ilir Meta:

“Dënoj me forcë ngjarjet kriminale të ditëve të fundvitit dhe të ditëve të para të vitit të ri, të ndodhura në disa qytete të vendit, e veçanërisht ngjarjen fatale në rrugën “Don Bosko”, në Tiranë, ditën e djeshme, që përfundoi me vrasjen e një shtetasi dhe plagosjen e disa të tjerëve.
Një akt i tillë kriminal, në një nga zonat më të populluara të kryeqytetit, jo vetëm përbën një sfidë të hapur të grupeve të krimit të organizuar ndaj shtetit dhe institucioneve të tij, por edhe një kërcënim të rëndë për sigurinë dhe për vetë jetën e qytetarëve të Tiranës.
Kjo është rrjedhojë e një sërë aktesh të tjera kriminale, që kanë mbetur të pazbuluara dhe ku autorët nuk janë vënë përpara drejtësisë.
I bëj thirrje Policisë së Shtetit, si dhe të gjithë institucioneve ligjzbatuese në vend, të forcojnë punën, së pari për arrestimin e autorëve të këtij krimi të rëndë, por edhe për të forcuar bashkëpunimin ndërmjet tyre për të parandaluar ngjarje të tilla në të ardhmen”