Si sot 31 vite më parë është themeluar dega e Partisë Demokratike në Kukës. 5 janari është dhe afati i fundit që Komisioni i Rithemelimit të Partisë Demokratike i dalë nga Kuvendi i 11 Dhjetorit i Sali Berishës, i ka lënë kryedemokratit Lulzim Basha që të dalë nga zyra.

4 ditë para protestës së thirrur nga ish-kryeministri Berisha, grupi i rithemelimit po zhvillon takim festiv me anëtarë e simpatizantë në Pallatin e Kulturës “Hasan Prishtina”.

Në këtë jubile morën pjesë themelues, anëtarë, drejtues ndër vite të kësaj dege. Ndërkohë gjatë fjalës së rastit, të gjithë bashkëfolësit kërkuan bashkimin e PD-së dhe largimin nga selia qendrore të Lulzim Bashës ose në të kundërt më 8 janar do të dale me dhunë nga protestuesit.

Kujtojmë se deputeti i Partisë Demokratike në Kukës, Flamur Hoxha nuk ishte pjesë e foltores që Berisha mbajti në Kukës para më shumë se një muaji, ndërkohë që i kishte sqaruar të gjithë me një mesazh të gjatë në rrjetet e tij sociale, ku thoshte se në fund do të mbështeste demokratët dhe vendimin që ata do të marrin.

Por ditën e djeshme, ai lajmëroi takim me demokratët në një tjetër ambient nga ai i Pallatit të Kulturës duke nënkuptuar kështu dhe qëndrimin e tij kundër Berishës.

“Miq e demokratë kuksianë! 5 janari i themelimit të degës së Partisë Demokratike Kukës është ditë e shenjtë. Të mblidhemi bashkë, të kujtojmë e të nderojmë atë që nënshkruan të parët në PD. Kështu nderojmë veten dhe të ardhmen tonë”-shkruan Hoxha në postimin e tij.