Kryetari i Grupit Parlamentar të Partisë Socialiste, Taulant Balla ka kujtuar sot 11 vjetorin e “21 Janarit”, ku gjatë protestës u vranë 4 protestues në Bulevard.

Përmes një videoje të publikuar në rrjetet sociale, Balla deklaron se më 21 Janar 2011 Sali Berisha urdhëroi të qëllohej me plumba ndaj protestuesve përballë Kryeministrisë.

Sipas Ballës, hezitimi 11 vjeçar i prokurorisë për të marrë si fillim në pyetje dhe më pas nën akuzë atë që dha urdhrin të qëllohet mbi popullin, është turpi i drejtësisë.

Postimi i plotë i Taulant Ballës:
KURRË NUK DO HARROJMË!
Më 21 Janar 2011 Sali Berisha urdhëroi të qëllohet me plumba mbi popullin që kishte dalë në protestën më të madhe kundër regjimit të tij korruptiv, duke u marrë jetën katër shqiptarëve të pafajshëm e plagosur dhjetra të tjerë. Sali Berisha e ka pranuar botërisht se ai ka qenë urdhëruesi. Kemi depozituar kallzim penal pas ngjarjes me prova dhe fakte ndaj zinxhirit komandues të vrasjeve më 21 Janar, kupola e të cilëve nuk u morën kurrë të pandehur. Hezitimi 11 vjeçar i prokurorisë për të marrë si fillim në pyetje dhe më pas nën akuzë atë që dha urdhërin të qëllohet mbi popullin, është turpi i drejtësisë. Për fat të keq edhe i drejtësisë së re, e cila po luan ping-pongun e vjetër me dosjen sipas tyre ende pa autor të dëshmorit Aleks Nika. Urdhëruesi është Sali Berisha!