Arlen Hasanaj, 34-vjeçari i arrestuar si autor i dyshuar i vendosjes së tritolit në banesën e kreut të Federatës Shqiptare të Futbollit Armando Duka, u la në burg këtë të shtunë nga gjykata e Shkallës së Parë të Durrësit.

Hasanaj ka dalë sot para Gjykatës në Durrës për masën e sigurisë, teksa gjykata ka pranuar kërkesën e Prokurorisë për biznesmenin 34-vjeçar.

I riu rezulton me një djegie në dorën djathtë dhe vendimi i ekspertit mjekoligjor është prova kryesore e organit të akuzës për ta vënë Hasanajn nën akuzë.

Do të jetë një raport paraprak i mjekësisë ligjore që do të japë verdiktin se me çfarë shenjash ka të bëjë për të bërë të mundur edhe përcaktimin nëse janë mbetje fitilash ose jo.

Sipas të dhënave mësohet se grupi hetimor ka ngritur dyshime se Hasanaj është djegur gjatë ndezjes së fitilit në momentin para se të hidhte kallëpin e tritolit në portën e jashtme të oborrit të vilës së Dukës mbrëmjen 24 janarit në Durrës.