Partia Demokratike përmes deputetes Orjola Pampuri ka publikuar të dhënat e sistemit TIMS, ku sipas tyre ish-ministri Damian Gjiknuri dhe zëvendëskryeminsitri Arben Ahmetaj kanë udhëtuar 18 herë në total, me pronarët e inceneratorëve, tashmë të shpallur në kërkim ndërkombëtar.

Gjatë deklaratave të tyre në Komisionin Hetimor Parlamentar, Ahmetaj dhe Gjiknuri u shprehën se nuk kishin udhëtuar asnjëherë jashtë vendin me Klodian Zoton, Mirel Mërtirin dhe Stela Gugallian.

Gjiknuri tha se njërin prej tyre e kishte takuar në disa raste, kurse tjetrin e njihte vetëm si fytyrë.

Gjatë ditës së sotme në Komisionin Hetimor Parlamentar për inceneratorët pritet të dëshmojë dhe vetë kryeministri Rama, ndërkohë që më herët para tij u pyetën disa ministra e ish-ministra, si dhe kryerbashkiakët e Tiranës dhe Durrësit.

DEKLARATË E PARTISË DEMOKRATIKE, ORJOLA PAMPURI

Mirel Mertiri, Klodian Zoto dhe Stela Gugallja nuk ishin të panjohur për qeveritarët dhe ardhja e tyre nuk ishte rastësi. Mjafton të shikoni historinë e udhëtimeve të Ahmetajt dhe Gjiknurit për të kuptuar se ata njiheshin, udhëtonin bashkë me letra që prej 2012, por të dhënat flasin për një njohje më të hershme mes tyre. Gjithçka për aferën e inceneratorëve ka qenë e planifikuar.

Po të hedhim një sy të historikut i udhëtimeve TË ISH-MINISTRAVE AHMETAJ DHE GJIKNURI rezulton se;

Nga 27 janari 2012 deri më 16 tetor 2019, Arben Ahmetaj ka udhëtuar 12 herë me dy pronarët e kompanive të inceneratorëve Mirel Mërtiri dhe Klodian Zoto.

Nga 27 janari 2012 deri më 23 korrik 2019, Damian Gjinkuri ka udhëtuar 6 herë me dy pronarët e kompanive të inceneratorëve Mirel Mërtiri dhe Klodian Zoto .

Mirel Mërtiri dhe Klodian Zoto janë sot në kërkim ndërkombëtar për korrupsion aktiv, pastrim të produkteve të veprës penale, të kryera në bashkëpunim, për aferën korruptive të inceneratorëve. Ndërsa, miqtë e tyre politikanë, të veshur njëri me kostumin e zëvendëskryeministrit dhe tjetri me atë të sekretarit të përgjithshëm të PS-së, vazhdojnë vjedhjet të pashqetësuar.

430 milionë euro janë vjedhur shqiptarëve me dijeni te plotë të Arben Ahmetajt, Damian Gjiknurit, Ëngjëll Agaçit, Erjon Veliaj, Lefter Koka.

Natyrisht asgjë nuk do të ishte e mundur pa dijeninë dhe miratimin e Edi Ramës.

Shqiptarët e kanë parë se si janë vjedhur paratë e shqiptarëve.

Ne inkurajojmë SPAK të ndalojë vazhdimin e vjedhjes dhe të çojë para drejtësisë çdo përgjegjës për këtë vjedhje të shekullit.

Edi Rama është i korruptuar.

Qeveria e tij është e korruptuar.

Me këta në krye, Shqipëria nuk mund të ketë zhvillim.

Shqiptarët duhet ta braktisin të shkuarën dhe të korruptuarit!