Presidenti i Ukrainës Volodymyr Zelensky ka pranuar takimin me delegacionin rus, në kufirin e Bjellorusisë.

Zyra e presidentit njofton se lideri bjellorus, Lukashenko ka marrë përgjegjësinë që gjatë udhëtimit, negociatave dhe kthimit të delegacionit ukrainas, të gjithë avionët, helikopterët dhe raketat e vendosura në territorin Bjellorusi do të qëndrojnë në terren.

“Rezultati i një bisede me Alexander Lukashenko. Ne ramë dakord që delegacioni ukrainas të takohet me rusët pa parakushte në kufirin ukrainas-bjellorusi, në zonën e lumit Pripyat.

Alexander Lukashenko ka marrë përgjegjësinë që gjatë udhëtimit, negociatave dhe kthimit të delegacionit ukrainas, të gjithë avionët, helikopterët dhe raketat e vendosura në territorin Bjellorusi do të qëndrojnë në terren”, shkruan Zelensky.

Ekipi negociator i Rusisë i kishte lënë afat deri në 15;00 me orën lokale, presidentit ukrainas që të jepte një përgjigje, ndryshe sipas tyre ai do të mbahej përgjegjës për gjakderdhjen.

Nuk dihet ende se cilët do të jenë përfaqësuesit e Ukrainës në këtë takim të nivelit të lartë.