ryeministri i Mbretërisë së Bashkuar, Boris Johnson, duket se “dyshon” për “sinqeritetin” e presidentit të Rusisë, Vladimir Putin, për të biseduar me Ukrainën.

Sipas zyrtarëve ukrainas, bisedimet midis përfaqësuesve të dy shteteve do të fillojnë kufirin me Bjellorusinë të hënën në mëngjes me orën lokale.

Ndërkohë duke folur me gazetarët në Katedralen Katolike të Ukrainës në Londër të dielën, kryeministri britanik u shpreh se Putini “ka vendosur të zhvillojë një luftë të zgjedhur kundër popullit të Ukrainës”, raporton BBC.

“Nëse ai dëshiron të ndalojë, nëse dëshiron të tërhiqet, nëse dëshiron të negociojë, ky është një lajm shumë i mirë. Unë kam dyshimet e mia, duhet t’ju them. Asgjë që kam parë deri më tani në sjelljen e tij nuk më bën të mendoj se ai mund të jetë i sinqertë”, tha Johnson.

Kryeministri vazhdoi, nëse homologu i tij rus është i sinqertë, ai “duhet të tërheqë makinën e tij të luftës nga Ukraina”.

Johnson tha se vendimi i Putinit për të vendosur forcat parandaluese të vendit të tij, përfshirë armët bërthamore, në gatishmëri të lartë është “një shpërqendrim nga realiteti i asaj që po ndodh në Ukrainë”.

Ai vuri në dukje “disa nga vështirësitë logjistike që po përjetojnë forcat ruse”, duke iu referuar gjithashtu të dhënave të fundit që flasin për viktima në radhët e rusëve.