Sanksionet perëndimore ndaj Rusisë janë të ngjashme me shpallje lufte, ka deklaruar të shtunën Vladimir Putin, raporton Reuters.

Putin ka theksuar se Moska duhet të mbrojë rusishtfolësit në lindje të Ukrainës, si dhe interesat e saj.

Presidenti rus deklaron gjithashtu, sipas AFP, se Rusia “dëshiron që Ukraina të “çmilitarizohet” dhe të ketë status neutral”.

Putin raportohet të jetë shprehur i vendosur se nuk ka plane të shpallë ligjin ushtarak në Rusi.

Presidenti rus tha se ky hap, pra shpallja e ligjit ushtarak do të ndërmerrej vetëm në “raste të agresionit të jashtëm, në zona të përcaktuara të aktivitetit ushtarak”.

“Por ne nuk kemi një situatë të tillë dhe shpresoj se nuk do ta kemi”, tha ai.

Komenti i tij vjen pasi ka pasur aludime se Putini po planifikonte të shpallte ligjin ushtarak në vend, që do të thotë se ligji i zakonshem civil pezullohet ose ushtria merr funksionet e qeverisë.

Ai tha se ka gjendje të tjera të veçanta emergjente që mund të përdoren në rastin e një “kërcënimi të jashtëm në shkallë të gjerë” – por se ai nuk ka plane as t’i prezantojë ato.