Kryeministri Edi Rama shprehet se nëse qeveria nuk do të kishte ndërhyrë për rregullimin e çmimit të energjisë elektrike, fatura për familjarët do të kapte shifra mbi 200 mijë lekë.

Rama u shpreh se kundërshtarët politikë po përpiqen të përdorin edhe bombat në Ukrainë për të nxjerrë popullin në rrugë.

“Çmimi me të cilin ne e sigurojmë energjinë është 61 lekë. Që të jemi korrektë, përtej kësaj rritje mesatarja në Janar-Shkurt ka qenë 5 herë më e madhe se ajo që keni paguar ju në faturë. Mbase shumë prej jush nuk e kanë pasur mendjen të dëgjojnë sepse qeveritë gjykohen për atë që ndodh. Ne nuk po lëmë të ndodhë diçka më të madhe. Po veprojmë si asnjë qeveri më parë. Kemi marrë përsipër 5-fishin e barrës financiare të faturës së energjisë. Unë nuk jetoj i izoluar nga populli.

Kjo qeveri nuk ka asnjë metër tjetër për të matur gjërat. Të tjerë kolegë në rajon dhe Europë më thonë kjo është një çmenduri financiare. Këtij populli i ra taksirati më shumë me tërmetin. Qeveria bashkë me ju do rezistojë bashkë ju dhe ju do keni transparencën e kësaj çmendurie financiare të shkuar aty. Pulsi i kësaj qeverie ecën me këtë popull duan apo nuk duan ata që shajnë dhe ngrenë akuza për të helmuar sa më shumë njerëz dhe për të ngrënë sa më shumë nga mishi i tyre i helmuar.

Edhe bombat mbi Ukrainë dhe tregjet e energjisë të shfrytëzohen për politikë duke u shfaqur të maskuar si shoqëri civile. Ky është një turp. Ky është një kulm. Luftën as nuk e nisi Shqipëria dhe as nuk e ndal dot Shqipëria. Shqiptarët duhet ta përballojnë këtë sfidë me të paktën të njëjtin dinjitet që ato familje shqiptare të goditur pa dallime, e përballuan humbjen e gjithçkaje”, deklaroi Rama.