Dhjetë korridore humanitare janë ngritur në rajonet e Kievit, Luhansk dhe Donetsk ditën e sotme për të evakuuar civilët nga vendbanimet e prekura nga pushtimi rus. Lajmi u bë i ditur nga zëvendëskryeministrja e Ukrainës, Iryna Vereshchuk.

Është planifikuar transport privat për njerëzit nga qyteti i rrethuar i Mariupolit në Zaporizhzhia, pasi autobusët janë bllokuar nga forcat ruse në pikat e kontrollit.

Trupat ruse kanë hyrë në qytetin e Slavutych, në veri të Kievit, një lëvizje që ka shkaktuar protesta në mesin e qindra civilëve ukrainas. Të shtunën herët, Oleksandr Pavliuk, kreu i administratës rajonale të Kievit, tha se “pushtuesit rusë hynë në qytetin e Slavutych dhe pushtuan spitalin e qytetit”.

“Slavutych, Dymer, Ivankiv – ne ju dëgjojmë dhe e dimë se keni nevojë për evakuim. Ne po punojmë për të,” tha zv.kryeministrja. Në qytetin jugor të Khersonit, Vereshchuk tha se banorët po protestojnë në mënyrë aktive kundër pushtimit.