Rusia do të përdorte armë bërthamore vetëm kur ekziston një kërcënim për ekzistencën e vendit – dhe jo si rezultat i luftës së vazhdueshme në Ukrainë, tha zëdhënësi i Kremlinit Dmitry Peskov në një intervistë për PBS Newshour të hënën.

“Çdo rezultat i operacionit (në Ukrainë), natyrisht, nuk është një arsye për përdorimin e një arme bërthamore,” tha Peskov. “Ne kemi një koncept sigurie që e thotë shumë qartë se vetëm kur ekziston një kërcënim për ekzistencën e shtetit, në vendin tonë, ne mund të përdorim armët bërthamore për të eliminuar kërcënimin për ekzistencën e vendit tonë”.

Kur u pyet për komentet e presidentit amerikan Joe Biden që e quajti Vladimir Putin një “kasap” dhe deklaroi se Presidenti rus nuk duhet të mbetet më në pushtet, Peskov tha “është mjaft alarmante”.

“Është fyerje personale,” tha Peskov. “Sigurisht, është krejtësisht e papranueshme. Nuk i takon Presidentit të Shteteve të Bashkuara të vendosë se kush do të jetë dhe kush është president i Federatës Ruse”.

Në një fjalim në Poloni të shtunën, Biden bëri një koment të improvizuar – “Për hir të Zotit, ky njeri nuk mund të qëndrojë në pushtet” – që i kapi zyrtarët amerikanë dhe ndërkombëtarë të papërgatitur, duke e detryruar Shtëpinë e Bardhë të bënte një sqarim të dytë.

Në intervistën për PBS, Peskov mohoi se forcat ruse kishin shënjestruar qëllimisht civilët në Ukrainë – pavarësisht se forcat ukrainase, gazetarët dhe refugjatët po largoheshin nga vendi duke përshkruar bombardimet brutale që godasin infrastrukturën civile, duke përfshirë shtëpitë, shkollat, spitalet dhe më shumë.

“Ata nuk po bombardojnë shtëpi. Ata nuk po bombardojnë apartamente. Ata nuk po bombardojnë objekte civile”, tha Peskov. “Bombardimet synojnë infrastrukturën ushtarake.”

SHBA zyrtarisht deklaroi javën e kaluar se forcat ruse kishin kryer krime lufte në Ukrainë. Gjykata Ndërkombëtare Penale në Hagë ka nisur gjithashtu një hetim për pushtimin.