Duke filluar nga ora 09:00 e mëngjesit të sotëm Grupi Parlamentar i Partisë Demokratike do të mblidhet në selinë blu me synimin final për të mbyllur debatin e brendshëm dhe e gjithë vëmendja të fokusohet duke bërë opozitën e bashkuar përballë qeverisë Rama.

Kryetari i komanduar Enkelejd Alibeaj ka mbledhur të gjithë deputetët që janë pjesë e Komisionit të Rithemelimit të Partisë Demokratike, por ajo që bie në sy është mungesa e ftesës ndaj liderit historik të PD-së Sali Berishës. Por ish-kryeministri Sali Berisha pavarësisht se është përjashtuar nga grupi parlamentar i PD-së sapo hyri në selinë blu për të marrë pjesë në këtë takim.

Kujtojmë se Gazment Bardhi ditën e djeshme reagoi ashpër kundër pjesëmarrjes së Sali Berishës në këtë takim duke e quajtur se kjo është “përdhosje e dinjitetit” për çdo deputet. Ai i ka kujtuar ish-kryeministrit vendimin për përjashtimin nga grupi parlamentar. Pjesë e diskutimeve mësohet se do të jetë situata aktuale në PD, pasi gjykata i ka dhënë vulën e selinë Rithemelimit, vendim që pranoi ndryshimet statuore të vulosura më 11 dhjetor të vitit të kaluar dhe riktheu Berishën në selinë blu. Kriza në PD pasqyrohet dhe në seli pasi zyrat po i nënshtrohen ndryshimeve.