Ish-kreu i Bindjes Demokratike, Astrit Patozi ka reaguar pas ftesës së Sali Berishës mesnatën e djeshme që “garda” e vjetër e përjashtuar dikur nga Lulzim Basha të bëhet sërish pjesë e Partisë Demokratike.

Gjatë një reagimi në rrjetet sociale, Patozi ka refuzuar këtë ftesë të Berishës duke theksuar se nuk është në kërkim të ndonjë partie, ndërsa theksoi se PD-ja është katandisur si mos më keq nga drejtimi i gabuar.

Reagimi nga Astrit patozi:
“FALEMINDERIT, POR NUK JAM NË KËRKIM…
Meqë më paska dalë emri mbrëmë dhe media është shprehur shumë e interesuar, e gjeta të udhës të jap një përgjigje të shkurtër.
Faleminderit që na kujtojnë ende, por unë nuk jam në kërkim të ndonjë partie. Aq më pak të atij lloji, që janë katandisur si mos më keq nga drejtimi i gabuar për një kohë të gjatë dhe të pandërprerë.
Ndihem shumë rehat sot me jetën dhe lirinë time, ndërkohë që për asnjë çast në këtë botë nuk kam menduar se politikë bëhet vetëm brenda një partie dhe vetëm rrotull një udhëheqësi legjendar dhe të pagabueshëm.
Por meqë ftesa verbale për “dasëm” qenka bërë pas mesit të natës, kujtoj se e njëjta gjë ka ndodhur edhe 5 vjet më parë, kur na larguan. Natyrisht, pa votë dhe pa mbledhje forumesh politike.
Të paktën, orën mund ta kishin ndërruar. Se në dorë vetë e kishin, si atëherë edhe tani”