Përfaqësuesja U21 e Shqipërisë luan sot ndaj Anglisë ndeshjen e saj të parafundit të eliminatoreve të Europanit. Një transfertë shumë e komplikuar ndaj superfuqisë në grupin ku bëjnë pjesë kuqezinjtë, ku gjërat nuk kanë shkuar deri tani ashtu siç shpresohej.
Shqipëria e nisi edicionin me pretendime të mëdha por është tani jashtë garës për dy vendet e para që garantonin kualifikimin dhe rrezikon të mbetet e parafundit nëse nuk siguron pikë të tjera përveç atyre 9 që ka siguruar në 8 ndeshjet e luajtura deri tani.
Përballë anglezëve, trajneri Alban Bushi ka vendosur t’u besojë shumë elementëve të Superiores, duke filluar nga Puja në portë, Makru e Selmani në mbrojtje, si dhe Rrapaj dhe Ismajlgeci në mesfushë, ndërsa aktivizohen edhe elementë të tjerë të dalë nga kampionati ynë si Çelhaka e Muçi.
ANGLIA U21: Bursik, Spens, kresuell, Harud-bellis, Xhonson, Xhouns, Smith Rou, Dojl, Gomes, Balogun, Gordon.
Trajner: Li Karslei
SHQIPËRIA U21: Puja, A. Marku, Selmani, Bajrami, Mitaj, Çelhaka, Kraja, Rrapaj, Dobra, Ismajlgeci, Muçi.
Trajner: Alban Bushi
/PanoramaSport
