Kryetari i Komisionit Shtetëror të Zgjedhjeve, Ilirjan Celibashi ka ngritur disa problematika të sistemit zgjedhor në Shqipëri, duke u shprehur se ka nevojë për përmirësim.
Në një konferencë të zhvilluar për transparencën e financimit politik, Celibashi tha se sot raportimi i partive politike është formal dhe sipërfaqësor.
Sipas tij, KQZ nuk ka autorizim për të shkuar më thellë në kontrollin e këtyre forcave politike.
“Financimi i partive politike dhe fushatave është rregulluar, ka ardhur në standartin ku jemi sot përmes ndryshimeve të vijueshme. Në 2020-ën, kuadri rregullator i fushatave mund të konsiderohet i plotë. Pasi është percaktuar kush i financon, kush janë limitet dhe kush i mbikëqyr. A ka vend për përmirësim të sistemit, mendoj që po.
Në diskutime me përfaqësues politik mendoj se ardhur koha edhe rregullimi i palëve të treta i personave jo politik, ka ardhur koha të përfshihet në monitorim edhe shkrimet në rrjetet sociale. Sot raportimi i partive politike është formal dhe sipërfaqësor i asaj që partitë deklarojnë. S’kemi autorizim ligjor për të shkuar më thellë. KQZ-së duhet t’i jepet autorizimi, apo një institucioni tjetër për të bërë verifikime çfarë prezantohet në raport. Mendojmë se ndryshimet në përgjithësi duhet të përfshijnë jo vetëm kodin ligjor por edhe ligjin për partitë politike. Edhe brenda partive politike mendojmë se ka pak transparencë” – tha Celibashi.
Përsa i përket partive, Celibashi thotë se më shumë se 50% e forcave që janë të regjistruara në KQZ, nuk ka informacione të sakta për adresat apo organet drejtuese.
“131 parti politike sipas KQZ-së të regjistruara, për më shumë se 50%, s’ka informacion për adresat apo organin drejtues. Mospërmbushja e këtij detyrimi duhet ta penalizojë deri në mosregjistrim në zgjedhje. 80 parti s’kanë marre pjesë në katër zgjedhjet e fundit s’ka gjurmë të aktivitetit politik. Ligji duhet të ndryshojë ne lidhje me kontrollin dhe verifikimin finanxhir të partive. Ligji duhet të parashikojë që KQZ t’i fokusojë kapacitet në partitë që marrin pjesë në zgjedhje për të tjerët që smarrin pjesë të ketë një sistem tjetër” – tha Celibashi.
