Disa qeveri, tregje dhe kompani evropiane janë shqetësuar se mbyllja mund të zgjasë. Tubacioni “Nord Stream 1” transporton 55 miliardë metra kub gaz në vit nga Rusia në Gjermani nën detin Baltik.

Muajin e kaluar, Rusia i uli flukset në 40% të kapacitetit total të tubacionit, duke përmendur kthimin me vonesë të pajisjeve që po riparohen në Kanada.

Evropa tani ka frikë se Rusia mund ta zgjasë mirëmbajtjen e planifikuar për ta kufizuar më tej furnizimin me gaz të saj, duke bërë rrëmujë planet për mbushjen e magazinave për dimër, ndërkohë që ka shtuar krizën e gazit, e cila ka çuar në marrjen e masave urgjente nga shumë qeveri dhe fatura të larta të dhimbshme për konsumatorët.

Ministri gjerman i ekonomisë Robert Habeck tha se vendi duhet të përballet me mundësinë që Rusia t’i pezullojë rrjedhat e gazit përmes “Nord Stream 1” përtej periudhës së planifikuar të mirëmbajtjes.

“Bazuar në modelin që kemi parë, nuk do të ishte shumë befasuese tani nëse gjendet ndonjë detaj i vogël teknik dhe më pas Rusia mund të thotë se ‘tani nuk mund ta ndezim më atë’,” tha ai.

Zëdhënësi i Kremlinit Dmitry Peskov hodhi poshtë pretendimet se Rusia po i përdorte naftën dhe gazin për të ushtruar presion politik, duke thënë se mbyllja e mirëmbajtjes ishte një aktivitet i rregullt dhe i planifikuar dhe se askush nuk po “shpikte” ndonjë riparim.

Që nga marsi, Rusia ka ndërprerë plotësisht furnizimin me gaz për disa vende evropiane që nuk e përmbushën kërkesën e saj për të paguar në rubla.

“Mujajt e fundit kanë treguar një gjë: Putini nuk njeh tabu. Prandaj nuk mund të përjashtohet një ndalesë e plotë e furnizimit me gaz përmes gazsjellësit “Nord Stream”,” tha Timm Kehler, drejtor menaxhues i shoqatës gjermane të industrisë Zukunft Gas.