Nëna e Dianës së vogël, vajzës 18-muajshe që vdiq nga uria në shtëpinë e saj në Milano ku ishte braktisur prej më shumë se 6 ditësh, mund të ketë vepruar kështu sepse e konsideronte të voglën pengesë për marrëdhëniet e saj me meshkujt.

Kështu shkruan prokurori i çështjes, duke e përshkruar gruan, Alessia Pifferi, si “të aftë për të kryer çdo mizori për të kënaqur nevojat personale, të lidhura me nevojën për tu argëtuar, me çdo kusht, marrëdhënie sentimentale dhe dashurore me burrat”.

Pikërisht në momentet kur i vdiq vajza, gruaja u pa në një festival në Leffe, në zonën e Bergamos, nën shoqërinë e partnerit të saj aktual.

Pifferi, 37 vjeç, ndodhet tashmë në burg me akuzën e vrasjes me dashje të rënduar edhe nga paramendimi, që duket përtej çdo logjike. Nga dëshmitë e ndryshme të mbledhura ajo përshkruhet si një person që ka jetuar duke thënë shumë “gënjeshtra”.

Ndërkohë partneri i saj ka deklaruar para hetuesve se nuk ishte në dijeni të braktisjes së fëmijës nga ana e Alessias.