Pas konflikteve në veri të Kosovës, të cilat shkaktuan frikën e një lufte të ardhshme, kryeministri Albin Kurti dhe presidenti serb, Aleksandër Vuçiç do të takohen sot në Bruksel.

Takimi vjen 13 ditë para se të nisë zbatimi i marrëveshjes së reciprocitetit, që siç kryeministri Kurti e ka lajmëruar do të vijojë të zbatohet nga data 1 shtator.

Ky është takimi i tretë që mbahet mes dy liderve, ndërkohë që ishin takuar dy herë në vitin e kaluar, ku nuk pati një arritje të ndonjë marrëveshje.

Takimi do të zhvillohet në një tryezë të ndërmjetësuar nga Shefi për Siguri dhe Politikë të Jashtme të Bashkimit Evropian (BE), Josep Borrell dhe të dërguarit të BE-së për dialogun Kosovë-Serbi, Miroslav Lajçak.

Kryeministri i Kosovës disa herë në media ndërkombëtare ka thënë se “ka gjasa që të ketë konfrontim me Serbinë”.

“Jemi të shqetësuar, por jo të frikësuar”, kishte thënë Kurti, teksa situatën e lidhte me gjendjen në Ukrainë.

Në anën tjetër, presidenti serb propagandonte se “Kosova është duke përgaditur vrasjen e serbëve”.

“Kurti dëshiron të jetë Zelensky i vogël që ta luftojë Putinin e vogël”, kishte thënë Vuçiç, teksa fliste për diskursin e luftës të cilin i ka kontribuar shumë shpesh.