Pas arrestimit të dy pensionistëve italiane, të cilët fituan 200 mijë euro, pasi përmes mashtrimit shisnin grimca ari, sot policia e Elbasanit ka vënë në pranga edhe pronarin e argjendarisë, një 53-vjeçar, i cili akuzohet për veprën penale “veprime që pengojnë zbulimin e së vërtetës.
Dy ditë më parë policia arrestoi shtetasit me inicialet F. M., 67 vjeç, banues në Napoli, Itali dhe R. G., 76 vjeç, banues në Milano.
Nga veprimet hetimore rezultoi se këta shtetas në bashkëpunim me njëri-tjetrin, kanë shitur ar (metal) në formë kokrrizash, me vlerë 200 000 euro, në Tiranë dhe Podgoricë, gjatë periudhës qershor-gusht 2022.
Materiali që keta shtetas kanë shitur ka rezultuar më pas, i përzier me metale të tjera. Ndërkohë, ditën e sotme është vënë në pranga edhe pronari i argjendarisë, ku dy italinët u kapën në flagrancë.
“Në vijim të operacionit policor të koduar “Fake Gold”, të finalizuar 2 ditë më parë, si rezultat i të cilit u arrestuan 2 shtetas italianë, për veprat penale “Kontrabanda me mallra të licencura” dhe “Mashtrimi”, kryer në bashkëpunim, si dhe u sekuestruan sasi ari i rremë dhe i pastër, specialistët për Hetimin e Krimit Ekonomik e Financiar në DVP Elbasan arrestuan në flagrancë për veprën penale “Veprime që pengojnë zbulimin e së vërtetës”, shtetasin J. T., 53 vjeç, banues në Elbasan, pronari i argjendarisë në qytetin e Elbasanit, ku u arrestuan në flagrancë 2 shtetasit italianë”, njofton policia.
