Liz Truss fitoi garën në Partinë Konservatore, duke siguruar postin e lideres së kësaj partie dhe të kryeministres së re të Britanisë së Madhe.

Ajo do të bëhet kryeministre të martën, më 6 shtator, pasi të vizitojë Mbretëreshën Elizabeth II, e cila zyrtarisht do t’i kërkojë Truss që të formojë Qeverinë e re britanike.

“Faleminderit që më besuat që të udhëheq dhe të shërbej për shtetin tonë. Do të ndërmarr veprime të guximshme që të gjithë ne të mund të tejkalojmë këto kohëra të vështira, të rrisim ekonominë dhe të tregojmë potencialin e Mbretërisë së Bashkuar”, shkroi Truss në Twitter pak pas njoftimit për zgjedhjen e saj.

Në garën partiake, Truss fitoi 57 për qind të votave. Pjesëmarrja në zgjedhjet e brendshme ishte e lartë, përkatësisht 82.6 për qind e anëtarëve partiakë votuan për udhëheqësin e ri.