Këngëtarja Melinda Ademi, e cila është e fejuar me menaxherin e saj, Granit Muhaxheri, është pyetur së fundmi për planet e çiftit sa i përket martesës.

E pyetur nëse ajo dhe Graniti planifikojnë ta kurorëzojnë dashurinë e tyre me një dasmë, këngëtarja ka preferuar të mos japë detaje, duke lënë të hapur të ardhmen e marrëdhënies së tyre.

“Nuk dua të tregoj, nuk është interesant nëse tregoj gjithçka”, u përgjigj ylli i muzikës në një prononcim për “Artistët Shqiptarë”.

Melinda Ademi u fejua vitin e kaluar, ndërsa momentin e propozimit e ndau edhe me ndjekësit e saj në rrjetet sociale.

Propozimi u bë buzë detit, ku Granit Muhaxheri kishte përgatitur një skenë të veçantë. Në një tabelë dekorative ishte shkruar: “A do të martohesh me mua?”

Pas propozimit, çifti organizoi edhe ceremoninë e fejesës, ku festuan me familjarët dhe miqtë e tyre më të afërt.

Ndërsa sa i përket dasmës, Melinda ka zgjedhur të ruajë misterin, duke mos zbuluar nëse ceremonia do të zhvillohet së shpejti.