Është shtyrë me dy javë mbledhja e Këshillit të Mandateve dhe Rregullores për të paraqitur dokumentet e plota, sa i takon kërkesës së PD-së për heqjen e mandatit të Olta Xhaçkës.

Në mbledhjen e sotme e cila nuk zgjati shumë, deputetët e opozitës dhe mazhorancës votuan unanimisht për të paraqitur pas dy javësh, dy raporte për deputeten.

Pjesë nga mbledhja e Këshillit:

Alibeaj: Uroj që të mos detyrohemi sërish të kërkojmë mbledhjen, është barra juaj zonja kryetare që të kërkoni dhe pa na detyruar ne të mblidhen firmat për mbledhjen

Bushka: Kërkohen dy javë kohë për të bashkërenduar dy kërkesat e PD. Kjo edhe për efektë të natyrës së çështjes dhe për efekt të punës së ngarkuar të Kuvendit.

Alibeaj: Që kërkoni çdo sebep për ta shtyrë mbledhjen kjo dihet. Që janë dy kërkesa kjo është e vërtetë. Ju kërkuat edhe më herët kohë për tu njohur me procedurat. Rëndësi ka ti shkohet deri në fund, s’duhet të nxjerrim sebep. Dy javë, por dy javë të jenë, jo më shumë dhe jo të vimë këtu pas dy javësh dhe të themi se duhet të njihemi dhe me disa materiale të tjera.

Kujtojmë se grupi parlamentar i PD, ka dorëzuar mocionin për heqjen e imunitetit të deputetit për ministren e Jashtme Olta Xhaçka, me argumentin se bashkëshorti i kësaj të fundit në kundërshtim me ligjin ishte shpallur investitor strategjik.