Rreth 15 persona janë shoqëruar në komisariatin e Devollit, për t’u marrë deklarimet lidhur me djegien e mjetit të Marsel Buçit.

Sipas informacioneve, mes të shoqëruarve është edhe Deizi Arapi, ndërsa shtetasit e tjerë janë persona që mund të kenë dijeni, apo persona që kanë patur konflikte më parë me Buçin. Janë hapur të gjitha dosjet që lidhen me Marselin, në mënyrë që të bëhet e mundur zbardhja e ngjarjes. Vetë Buçi ka deklaruar në polici se dyshimet e tij janë tek Deizi Arapi, pasi ajo ka përmendur emrin e tij kur iu dogj makina e saj.

Zbardhja e ngjarjes vështirësohet pasi në atë zonë nuk ka kamera sigurie.

Marsel Buçi pohoi gjatë një komunikimi në celular se ka dyshime të forta se makina është djegur nga motrat Arapi. ”Nuk kam konflikte me persona të tjere. Motrat më kanë akuzuar për djegien e makinës, por unë nuk kam gisht në këtë ngjarje. Makina mu dogj në orën që është djegur edhe makina e vajzave,çfarë më bën të mendoj se mesazhi për mua është i qartë”, u shpreh ai.