Pre e grabitësve ka rënë mbrëmjen e djeshme gjimazi “Babë Dudë Karbunara” në qendër të qytetit të Beratit. Mësohet se hajdutët kanë thyer xhamin e dritares së katit të dytë të ndêrtesës dhe pasi kanë marrë 20 IPode (tableta) që ndodheshin në një tip kasaforte janë larguar ne vrap.

Ata janë pikasur nga roja e shkollës, i cili ka njoftuar policinë. Shkolla tashmë është nën mbikqyrjen e policisë dhe pritet mbërritja e ekspertëve kriminalistikë që do kryejnë këqyrjen e vendit të ngjarjes.

Gjimazi Babë Dudë Karbunara ishte duke u boshatisur prej disa ditësh pasi do të shembet për tu rindërtuar nga e para. Mësohet se shumica e materialeve të shkollës janë hequr, ndërkohë që kasaforta do të largohej ditën e nesërme me vinç, për arsye të peshës së saj. Dyshimet e para lidhen me faktin se hajdutët kanë qenë të mirë informuar për heqjen e kasafortës dhe kanë ndërmarë vjedhjen mbrëmjen e djeshme.

Në Komisariatin e Policisë së Beratit është shoqëruar për të dhënë dekratat e tij roja i shkollës, ndërkohë që po punohet për zbardhjen e ngjarjes si dhe identifikimin dhe kapjen e autorit (autorëve) të vjedhjes.