Drejtori i Policisë së Shtetit Muhamet Rrumbullaku ka vendosur përjashtimin e Florenc Bicerrit nga radhët e policisë pas arrestimit të tij me drogë në Turqi.
Në njoftim për mediat, policia bën me dije se Bicerri kishte dalë nga Shqipëria përmes Rinasit në datë 5 Tetor.
Tashmë është ngritur një grup hetimor bashkë me Agjencinë e Mbikëqyrjes Policore për zbardhjen e plotë të këtij rasti dhe kapjen e personave të tjerë të përfshirë në trafikun e drogës.
Njoftimi i policisë
Policia e Shtetit, në bashkëpunim me homologët turq, në lidhje me një rast trafikimi të lëndëve narkotike, në të cilin janë të përfshirë 3 shtetas shqiptarë, njëri prej tyre punonjës policie, ka ngritur një grup të dedikuar hetimor, për hetimin e rastit.
Sqarojmë se punonjësi i Komisariatit të Policisë Rrugore Tiranë, shtetasi Florenc Bicerri, tashmë i arrestuar në Turqi, ka dalë nga Shqipëria, nëpërmjet Rinasit, më datë 05.10.2022.
Për këtë punonjës policie, Drejtori i Përgjithshëm i Policisë së Shtetit ka urdhëruar përjashtimin e menjëhershëm dhe përgjithmonë, nga Policia e Shtetit.
Ndërkohë, grupi i dedikuar hetimor, në bashkëpunim me Agjencinë e Mbikëqyrjes Policore dhe me homologët turq, po vijon punën për zbardhjen e rrethaneve të rastit, evidentimin dhe kapjen e personave të tjerë të implikuar në këtë rast të trafikimit të lëndëve narkotike.
