Ministri i Brendshëm, Bledi Çuçi ka deklaruar ditën e sotme në ceremoninë e diplomimit të 246 punonjësve të rinj se policia mbetej institucioni më i besueshëm për publikun shqiptar pavarësisht tentativave për ta përbaltur.

Duke u nisur edhe nga akuzat e bëra së fundmi ndaj policisë për vdekjen e 32 vjeçarit, Lear Kurti, Çuçi u shpreh i bindur se policia gëzonte edhe besimin e partnerëve ndërkombëtarë.

“Policia vazhdon të jetë një ndër institucoonet me besimin më të lartë në komunitet. Me gjithë tentativat për ta përbaltur, ajo vazhdon të jetë një ndër institucionet që gëzon besimin e publikut shqiptar dhe si asnjëherë tjetër besimin e partnerëve tanë ndërkombëtarë. Nëse disa vite më parë, bashkëpunimi me agjencitë europiane ishte vetëm në shkëmbimin e informacioneve, sot ne kemi operacione të përbashkëta me ta. Një gjë që ishte e pamendueshme disa vite më përpara”– u shpreh Çuçi.