Mbrëmjen e djeshme pas 26 vitesh, Elsa Lila risolli këngën “Pyes Lotin” në natën e 3 të “Festivalit të Këngës”, ku këngëtarët pjesëmarrës performuan në skenë me artistë të njohur shqiptarë. Elsa performoi krah reperit të mirënjohur Capital T dhe kënga ishte sjellë në një version të ri.

Me këtë këngë, Elsa mori pjesë në ‘Festivalin e 35-të të Këngës’ në 1996. Një festival i cili u mbajt mend gjatë prej fitores së këngëtares më të re, e cila preku skenën e këtij edicioni me këngën e kompozuar nga Valentin Veizi, me tekst nga Enrieta Sina.

Mirëpo, risjelljen e këngës nuk e ka pritur aspak mirë kompozitori Veizi. Në një reagim në Facebook ai shkruan se kënga është rikënduar pa lejen e tij si autor dhe kompozitor i saj dhe sipas tij ky është një version i shëmtuar i këngës së tij.

Reagimi i plotë:

MOS MA BËNI PIS KËNGËN !

Sot kam marrë shumë mesazhe e telefonata nga shokë e miq, dashamirës e simpatizantë të muzikës sime të indinjuar në lidhje të një varianti të këngës “Pyes Lotin” që është kënduar nga Elsa Lila edhe Capital T në natën e tretë Festivali 61 i RTSH-së, duke qenë se s’kam patur mundësi të ndjek festivalin e kërkoj edhe e dëgjoj në YouTube këngën, më bënë përshtypje (indinjuan) dy gjëra : e para nuk e di kush ka marrë guximin e ka pasur kurajon të ma bej “pis” këngën time, mirë që nuk kane aftësinë profesionale për të “rifreskuar” apo të sjellin ndryshe një këngë, por këta nuk kanë as edukatën edhe as respektin të paktën të kontaktojnë për të marrë lejen e autorit .

së dyti :Ti (kushdo)mund të rikëndosh një këngë, por nuk ke asnjë të drejte të ndryshosh e të denigrosh këngën pa lejen e autorit ,(kompozitorit). Me lini t’ja u them troç edhe një herë Lilës edhe Capitalit, modeli i këngës qe ju sollët është modeli se si mund të denigrosh, shpërfytyrosh një kënge aq te bukur si kënga “Pyes Lotin” , prandaj do ti lutem Radio televizionit Shqiptar ta heqi nga çdo lloj transmetimi këtë variant të shëmtuar!